|
 |
Спорт / Фудбал
"Дани не вредеше повеќе од 15 милиони"
 Руската фудбалска јавности и два дена по сензационалниот трансфер на Дани од Динамо (М) во екипата на Зенит зборува единствено за економскиот аспект на трансферот. Се случи она што го немаат ниту дел од најголемите европски фудбалски лиги, рекордни 30 милиони евра исплатени за фудбалер кој настапува во руската Премиер-лига. Рекордот е соборен, а во Русија уште еднаш се покажа дека парите очигледно не недостасуваат кога се во прашање фудбалерите и успесите на екипите. Зенит со својот мега-спонзор "Газпром" и натаму се обидува тимот да го изнесе во европските фудбалки височини, а по успехот со освојувањето на Купот на УЕФА лани, сега цел е Лигата на шампионите.
Рекорд од европски размери
Завчера Зенит го реализираше историскиот трансфер во рускиот фудбал. 25-годишниот играч за врска, Дани, за рекордни 30 милиони евра замина од Москва и во иднина ќе го носи дресот на шампионот од Ст. Петерсбург. Сумата на зделката е вистински хит! Ова не е само најголемиот трансфер во Русија, туку поголем и од најголемиот досега реализиран во германската Бундес-лига, која е далеку поатрактивна лига од руската. Таму рекордот го држи Рибери со 25 милиони евра, но Дани во Русија го собори и неговиот за цели 5 милиони евра.
Тимот од Ст. петерсбург доби еден класа фудбалер на средината на теренот. Момче кое уште на 15-годишна возраст го направи своето деби за селекцијата во победата на Португалија над Фарските Острови од 5:0. Беше вистинска ѕвезда во 2005 година кога од Спортинг реши да замине на печалба во Русија. Во Зенит стравуваа за иднината на клубот по заминувањето на Аршавин, па затоа поитаа да го купат Дани. Задоволни се и фановите, презадоволен е и тренерот.
За пола пари можеа да го купат Билјалетдинов
Руските медиуми се потсетуваат на изјавите на Португалецот дека се чувствува одлично во Москва и дека не би сакал да си оди од Динамо. Сепак, се случи тоа што се случи, а Русите сега прават пресметки дали Зенит не го прецени Дани според сумата која ја плати за него?
Ако се погледнат дел од фудбалерите кои му стоеја на располагање на Адвокат да бира како нови засилувања, можеби ќе можеше да мине и поефтино - далеку поефтино. Не е тајна дека и за половина од овие пари можеа да им го "соберат" капитенот на Локомотив од Москва, Билјалетдинов. Можеа да го донесат и Жирков од ЦСКА. Можеа дури да одат и на уште поатрактивно име, но тие решија да платат богатство за Португалецот.
Колку оваа нова инвестиција ќе биде полезна, останува да покаже времето, но не на долги релации затоа што од Дани, Зенит и фановите чекаат резултати веднаш.
Можеше ли Динамо да го задржи?
Динамо, теоретски, можеше и да не му дозволи на Дани да замине во Ст. Петерсбург. Сепак, за тоа ќе мораше да му понуди едно брдо пари, рајски куќи или двапати повеќе од она што Зенит ќе му го исплати за договорот со важност до 2011 година. Оттука, малкумина во Русија веруваат дека Динамо имаше шанси во трката со Зенит за Дани. Сумата од 3 милиони годишно која Дани ќе ја добива за престојот во Зенит беше преголема за да успеат да го натераат московјаните да остане во нивните редови.
Зенит и натаму ќе продолжи со битката за најголемите имиња во рускиот фудбал. Тоа го најави и Константин Сарсанија, кој работи во улога на главен советник за трансфери во клубот. Тој не криеше ден по трансферот на Дани да најави дека Зенит од сега ја почнува "мисијата продолжување на договорите со Погребњак и Тимошчук". Фудбалерите за кои се интересираат големите европски клубови, според Сарсанија, ќе добијат "симпатични" понуди за да останат во Русија.
На што останува Динамо?
Плусот и минусот се големи. Да го загубиш најдобриот играч за врска, а да добиеш цело богатство. Сега останува да се сочека следниот потег на управата на еден од тимовите кои во последниве години имаат најголеми буџети во руската Премиер-лига. Експертите велат дека Динамо (М) направи одличен потег со продажбата на Дани. Сумата која ја доби е одлична. Подобра не можеше да добие ниту да го продадеше во Премиер-лигата во Англија, каде клубовите најмногу плаќаат за фудбалските имиња. Проценките се дека Дани на европскиот трансфер маркет не вреди повеќе од 15 милиони евра, но... Зенит не мисли така.
Динамо го донесе уште вчера Австралиецот Вилкшир од Твенте. Тој е крилен фудбалер и не може да ја пополни празнината која ја остави Дани. За ново име имаат време само уште неполна недела.
Аршавин може да си оди за 22 милиони евра
Агентот на Андреј Аршавин е сигурен дека по доаѓањето на Дани неговиот клиент го напушта Ст. Петерсбург. Најдобриот руски фудбалер од последното ЕП, според агентот, за сума од 22 милиони евра може да си оди од Зенит. Прашање е само дали Тотенхем ќе продолжи и натаму со притисокот за да го донесе рускиот фудбалер во својот тим до крајот на трансфер периодот.
10 НАЈСКАПИТЕ ТРАНСФЕРИ ОВА ЛЕТО
Играч од во цена (во евра)
Дани Алвеш Севиља Барселона 32.000.000
Дани Динамо (М) Зенит 30.000.000
Жо Цска(М) Манчестер С. 24.000.000
Роби Кин Тотенхем Ливерпул 24.000.000
Амаури Палермо Јувентус 22.800.000
Хавиер Масчерано Коринтијанс Ливерпул 22.500.000
Давид Бентли Блекбурн Тотенхем 22.000.000
Роналдињо Барселона Милан 21.000.000
Лука Модриќ Динамо (З) Тотенхем 21.000.000
Босингва Порто Челзи 20.500.000
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|