|
 |
|
Спорт / Фудбал
|
|
Со верба и борба до бараж!
Македонија ги знае противниците преку кои ќе се бори за следниот квалификациски циклус. Русија, Словачка, Република Ирска, Ерменија и Андора. Како сето тоа е гледано од страна на Горан Пандев. Нашиот најдобар фудбалер вчера ги дозна противниците по ждрепката во Варшава, а само неколку минути подоцна експлодираше на "Џузепе Меаца" во дресот на Интер. Постигна нов гол и асистираше во победата од 3:0 над Каљари.
"Тешка и неатрактивна група... Посакував место Русија да бидеме со Италија, но тоа е тоа", коментира Пандев за противниците кои ни се паднаа на ждрепката во неделата.
"Добивме противници кои ни се добро познати. Со сите досега сме ги одмериле силите. Имаме и добри, но и лоши спомени. Таа лекција од минатото против споменатите репрезентации треба да ни биде од голема корист и едно големо искуство за во новиот циклус да стигнеме до добар резултат. Ривалите се селекции кои можат да бидат 'ранети' од секого во групата. Апсолутен фаворит е Русија, но и со нив сега ќе се надигруваме. На претходните два средби Русија може не надиграа во Скопје, но затоа, пак, во Москва се држевме добро и имавме шанси за нерешен резултат. Словачка е многу незгодна и секогаш непредвидлива, но во Скопје ќе мора да ги победиме и нив и Република Ирска со кои ќе се бориме за второто место во групата...", појаснува Пандев, кој во својата репрезентативна кариера од новите ривали нема дуели само против Република Ирска.
"Ирска го има Трапатони и тоа е нивното најсилно оружје. Сепак, на нас ни оди против ваквите селекции. Во минатиот циклус ја имавме Шкотска. За другите селекции нема што да се каже. Ерменија и Андора се селекции против кои мора да победиме и да освоиме максимални 12 бодови. Само така може да се надеваме на нешто повеќе во новиот циклус", открива Пандев.
Фудбалерот кој со 22 гола во дресот со државниот грб е категоричен околу очекувањата околу нашите реални можности за новиот циклус:
"Ова се квалификации на кои мора да одиме на добар резултат. Веќе неколкупати досега кажав дека оваа наша генерација сега е зрела да направи нешто повеќе на репрезентативен план. Ќе се надигруваме со сите и ќе одиме на победа на секој меч. Таков е модерниот фудбал иако до стартот на квалификациите има уште многу време. Далеку е септември, а до тогаш треба добро да се подготвиме. Да има што е можно повеќе тест средби низ кои треба да се дојде до потребната игра со која би тргнале во битката за бараж и борбата за бодови. Најважно е да се тргне со победа. Би било добро да почнеме со Андора на гости, а потоа дома со некој од фаворитите", додава Пандев, кој гледа со голем оптимизам пред стартот на новите квалификации ден по дознавањето на противниците со кои ќе ги одмериме силите во претстојните две години.
Пандев сега е преокупиран со настапите во Интер каде му оди одлично. Игра стандардно по 90 минути, дава голови, асистира и победува. Тој внесе нов дух во Интер иако на ждрепката во Варшава судбината сакаше да не добие ниту една селекција во која игра негов клупски другар од Милано. А имаше шанси. Во игра беа Станковиќ (Србија), Снајдер (Холандија), Киву (Романија)...
|
|
|
|
|
 |
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|