Шпанскиот дневник "Марка" во неделното издание известува дека мадридски Реал практично ги договорил условите за соработка со Жозе Мурињо и дека само се чека потпишувањето на договорот.
Одличниот португалски тренер, кој вчера го одведе Интер до титулата европски првак со победата од 2-0 против Баерн на "Сантијаго Бернабеу", со своите фудбалери не се врати синоќа на прославата во Милано.
Остана во Мадрид, што италијанските медиуми го прокоментираа како почеток на преговорите со "кралскиот клуб". Дека тоа е навистина така, потврдува и "Марка", која тврди дека Мурињо би требало да потпише договор со Реал во текот на вторник или среда.
Се тврди дека контроверзниот Португалец ќе заработи десет милиони евра за секоја од четирите сезони колку што би требало да се задржи на "Сантијаго Бернабеу". "Марка" наведува дека Реал веќе ги договорил со Мурињо сите детали околу подготовките за новата сезона, а единствено под знак прашалник е датумот на претставување пред новинарите, но се очекува тоа да се случи претстојниот петок.