Селекторот на македонската фудбалска репрезентација Мирсад Јонуз најавува победа на дуелот со Андора и покрај проблемите со повредени играчи.
На квалификацискиот дуел в петок во Ла Вела во составот на Македонија нема да бидат Горан Пандев, Горан Попов, Дарко Тасевски и Дарко Тофиловски.
- Во пресрет на двете претстојни квалификациски средби се судруваме со многу повредени играчи. Сепак, можам да кажам дека атмосферата во националниот тим е добра. Сите бевме под мал психолошки притисок по шпекулациите околу иднината на Пандев во националниот тим. Добро е што нашиот капитен ги демантираше гласините околу напуштањето на репрезентацијата. Имаме доволно информации за играта на противникот, подготвени сме да одиграме максимално сконцентрирано и да ја оствариме зацртаната цел, а тоа е победа, изјавува Јонуз за веб страницата на ФФМ.
Тој додава дека Стручниот штаб направи анализа на досегашните 14 натпревари што ги одигра Македонија под негово водство. Анализата се однесува на позиции од кои се постигнати головите, позиции од кои се примени головите, пропуштените шанси, слабости во извршувањето на тактичките задачи. Направена е анализа и на играта на Андора на средбата со Русија и според Јонуз се работи за цврст, незгоден противник кој главен акцент става на опструкцијата на играта и движењето на противникот.
Македонските фудбалери претпладнево го искористија за прошетка, а единствениот денешен тренинг е закажан за 19 часот, термин кога ќе биде одигран и натпреварот со домаќинот Андора.