Африканскиот шампион Мазембе и првакот на Северна и Средна Америка Пачука ќе ги отворат четврфиналните дуели на Светскиот клупски шампионат во Абу Даби. И двата клуба имаат искуство бидејќи претставникот од Конго по вторпат е на светскиот собир, а Мексиканците по третпат. Минатата сезона Мазембе се "сопна" уште на првиот меч, но остави впечаток дека се работи за одличен состав, па оваа година со многу поголеми амбиции влегуваат на турнирот. "Гавраните", како што е нивниот прекар, се надеваат дека ќе испишат клупска историја и ќе стигнат до големиот меч со бразилскиот Интернационал.
"Минатата година несреќно загубивме во четвртфиналето, но оваа доаѓаме поискусни и подготвени. Искрено, не знаеме ништо за Пачука. Но не не интересира противникот, ние доаѓаме со големи амбиции и посакуваме сензација на турнирот", изјави капитенот на Мазембе Михајо.
Пачука најдобриот резултат го оствари во 2008 година кога го освои четвртото место, а во 2007 беше елиминиран во првото коло од тогашниот африкански првак Етоил ду Саел од Тунис.
"Целта ни е да стигнеме до финалето и да играме со Интер. Знаеме дека нема да биде лесно бидејќи има многу незгодни противници на турнирот. За Африканците знаеме дека поседуваат квалитет иако никогаш не сме ги гледале", изјави напаѓачот на Пачука Едгар Бенитез.