Актуелниот европски и италијански првак, Интер започна преговори со Фабио Капело, селекторот на англиската фудбалска репрезентација, околу можно преземање на клупата на миланскиот клуб.
Рафа Бенитез долго време се наоѓа на удар на критиките и се помало е трпението во клубот, а тоа би можело да биде во целост загубено ако шпанскиот стратег не го доведе Интер на тронот на Светското клупско првенство кое е во тек.
Ништо подобра не е ситуацијата ниту на Фабио Капело, кого медиумите го 'распнаа' по неуспехот на југот на Африка, каде со силна репрезентација не успеа да стори ништо повеќе од осмина финале на Мундијалот.
Според информациите на дел од италијанските медиуми, претседателот на Интер, Масимо Морати веќе го исконтактирал Капело и му ги пренел своите мисли и идеи, па се очекува реакцијата на прославениот стратег кој - водејќи ги Милан, Јувентус, Рома и Реал Мадрид - освои петнаесет титули.
Во конкуренција за наследник на Бенитез и понатаму се и Диего Симеоне, Валтер Зенга и Леонардо.