Најпознатиот британски таблоид "News of the World" во своето денешно издание објави дека Манчестер Јунајтед наводно му предложил на Тотенхем размена за играчи понудувајќи го Бугаринот Бербатов во замена за репрезентативецот на Хрватска, Лука Модрич.
Играчот за врска на Тотенхем наводно се наоѓа на мета на многу англиски клубови, меѓу кои и Јунајтед, Челзи и Сити, а "црвените ѓаволи" се надеваат дека го пронашле вистинскиот начин да ја натераат управата на лондонскиот клуб да го пушти Хрватот токму во нивните редови. Имено, Хари Реднап е во потрага по добар напаѓач, Бербатов полека станува вишок во екипата на Алекс Фергусон, а како дополнителен податок се наведува дека цената на двајцата играчи на фудбалскиот пазар е речиси иста.
Потсетуваме, Бербатов во Јунајтед пред три години дојде токму од Тотенхем и на 128 меча во сите натпреварувања постигна 45 погодоци (во Премиер лигата 96/40).