Фудбалерот на Велез Сарсфилд од Аргентина, Рики Алварез е во фокусот на тренерот на Арсенал, Арсен Венгер, а се смета на овој играч да биде наследник на Цеск Фабрегас. Алварез би требало да пристигне во Лондон за сума од 11 милиони фунти, а се работи за ист тип на играч како Фабрегас.
Дали оваа информација најавува дека ќе дојде до договор меѓу Арсенал и Барселона за капитенот на тимот од Лондон е неизвесно во моментов. Барселона е упорна за да го ангажира, но сè уште нема ништо конкретно околу новата понуда која треба да пристигне на адреса на Арсенал. Оттаму во моментов е поинтересно како ќе се одвиваат работите меѓу Арсенал и Велез, но и за тоа како ќе реагираат тимовите на Севиља, Малага, Интер, Рома и Шалке 04, кои исто така имаат пројавено заинтересираност за Алварез.
Се работи за еден од најталентираните играчи во Аргентина на кого му предвидуваат одлична иднина. Има 23 години, а го привлече вниманието со игрите кои ги прикажуваше во последните месеци.
"Нема да го запираме играчот доколку сака да си замине. Ако Арсенал достави понуда до нас и таа биде задоволителна тогаш ќе оставиме на играчот самиот да одлучи дали сака да се пресели таму", велат од Велез.
Цеск помага за трансферот
Дека Фабрегас е упорен за да се врати во Барселона може да се заклучи и од неговиот потег во кој е решен да се откаже од сумата од 15 проценти која треба да ја добие при трансфер во друг тим. Тоа може да биде олеснително за Барса и ваквата вест може да биде причина за конечно да се понуди сума која ќе биде примамлива за Арсенал.
Вела останува во Арсенал
Фудбалерот од Мексико, Карлос Вела ќе остане во тимот на Арсенал и следната сезона. Агентот на фудбалерот објави дека тој нема да ја менува средината што значи дека во новиот шампионат ќе се обиде да покаже дека и понатаму ја има старата форма бидејќи последната сезона не одигра на највисоко ниво.