Натпреварот во холандскиот куп меѓу екипите на Ајакс и АЗ Алкмар синоќа беше прекинат, откако голманот на гостинската екипа Естебан удрил еден хулиган кој истрчал на теренот. Судијата поради ваквиот потег му даде црвен картон на Естебан.
Навивачот на Ајакс во 36. минута истрча на теренот на стадионот во Амстердам и го клоцна голманот на екипата од Алкмар. Естебан не му остана должен и му возврати со удар.
Судијата веднаш по инцидентот го исклучи голманот, а бесен поради ваквата одлука тренерот на АЗ Алкмар Герт Јан Вербек одлучи да ја повлече екипата од теренот.
- Вербек оваа одлука ја донесе поради целокупната ситуација, а играчите подоцна во соблекувалната ни кажаа дека не се чувствуваат безбедно на теренот, изјави техничкиот директор на АЗ Алкмар Ернест Стјуарт.
Официјалниот претставник на Ајакс Жероп Слоп истакна дека полицијата го упасила 19-годишниот хулиган, кој го нападна гостинскиот чувар на мрежата.
- Видов дека Естебан е нападнат и дека само се бранеше. Не знам како јас би реагирал во таква ситуација, но тој е момче со латиноамерикански темперамент. Ја разбирам одлуката на гостинскиот тим, беа под силен впечаток и емоции, нагласи Слоп.