Фудбалерот на Барселона, Лионел Меси денеска во Цирих ќе го брани тронот во фудбалскиот свет кој го поседува веќе две години. Во конкуренција за да го симнат од врвот се освојувачот на златната топка од 2008 година, Кристијано Роналдо, и третопласираниот од 2010 година, Чави. Барселона со две и Реал со една номинација ќе се борат за трофејот "Златна топка" така што и при ова "натпреварување" се се врти околу двете најдобри екипи од Шпанија.
Сите очекувања се најдобриот фудбалер на Каталонците да стигне до уште една награда и да направи хет-трик со што ќе го повтори успехот на Мишел Платини и ќе стане само вториот фудбалер кој успеал да стигне до три титули во серија.
Иако е сосема јасно дека Меси е во предност во однос на Роналдо и Чави, сепак, мора да се остави простор бидејќи секогаш се можни изненадувања при гласањата. Од лани доделувањето на Златната топка доби нов формат при гласањето односно покрај тоа што гласаат тренерите и капитените се бројат и гласовите на новинарите бидејќи наградата ја доделуваат заедно ФИФА и Франс фудбал.