Сите фудбалери на лондонскиот премиерлигаш Тотенхем побараа итен лекарски преглед на срцето, откако играчот на Болтон, Фабрис Муамба во петокот, за време на натпреварот на овие два клуба, претрпе тежок срцев удар, јави дописникот на МИА од Лондон.
Лекарот на Тотенхем изјави дека за време на денешната рутинска контрола што била направена на двајца-тројца играчи, а која се практикува секој ден, сите фудбалери на овој клуб го информирале дека бараат детален кардиолошки преглед. Лекарот Санџај Шарма објасни дека станува збор за реакција на „шокирачките сцени“ од борбата на лекарите да му ја повратат работата на срцето на Муамба, што се случуваше на теренот на стадионот на Тотенхем, пред очите на сите играчи.
Муамба се наоѓа на интензивна нега во една лондонска болница. Лекарите денеска соопштија дека неговата состојба и натаму е критична и тој се уште се бори за својот живот. Лекарите открија дека по ударот, неговото срце не работело два часа.
Засега нема официјално објаснување која е причината еден млад фудбалер да претрпи тежок срцев удар за време на фудбалскиот натпревар, но некои кардиолози сметаат дека тој имал вродена срцева маана на срцевиот мускул, што според нив, може и да не се открие на редовен преглед. Кардиолозите веруваат дека доколку Муамба не се занимавал со спорт, изложувајќи го срцето на екстремни напори, неговиот недостаток можеби никогаш не би се појавил.