Состојбата на поранешниот младински репрезентативец на Англија Фабрис Муамба останува критична откако доживеа срцев удар за време на 1/4 финалниот дуел меѓу неговиот Болтон и Тотенхем. Последната информација од Лондонската кардиолошка болница, каде се наоѓа 23-годишниот играч, е од неделата и вели дека состојбата останува критична.
Дел од англиските медиуми објавија детали околу оваа потресна приказна и пишуваат дека Муамба се срушил на теренот во 18:11 часот по локално време, а лекарските тимови на двата клуба двапати користеле дефибрилатор да го вратат во живот за потоа со амбулантно возило да го пренесат несреќниот фудбалер во болница. Во неа докторите цели 120 минути се обидувале на најразлични начини да воспостават нормална работа на неговото срце и успеале во тоа дури во 20:00 часот.
Иако ситуацијата за сега е стабилна, ситуацијата со фудбалерот се оценува како критична.
"Им благодариме на сите за поддршката за Муамба и продолжуваме да се молиме за неговиот живот. Сите се шокирани од овој настан и ве разбирам дека сите сакате да знаете повеќе за состојбата. Можам да кажам само дека Муамба е голем борец и јас сум оптимист и верувам дека ќе биде добро", изјави тренерот на Болтон Овен Којл за новинарите и додаде дека на тимот моментално не му е до фудбал, па не ни размислуваат кога повторно ќе играат.
Вереницата на Муамба, Шауна на својот профил на Твитер напиша:
"Ви благодарам на сите за љубовта и поддршката која ни ја давате и ве молам продолжете да се молите за Фаб".