Златан Ибрахимовиќ со една нога е во ПСЖ и само часови го делат од преселба од Милано во Париз. До вчера вечерта немаше официјална потврда од францускиот клуб ниту од агентот на фудбалерот Мино Раиола за евентуален договор меѓутоа дадоа сигнали дека разговорите се движат без заостанување.
Според извори од италијанската "Газета дело Спорт" Раиола се уште преговара со спортскиот директор на парискиот тим Леонардо околу личните услови на фудбалерот. Бразилецот за медиумите откри:
"Преговорите продолжуваат и ние се надеваме дека Златан ќе биде дел од ПСЖ", изјави Леонардо.
Некаде околу 14:30 и 16:00 часот адвокатот на Ибрахимовиќ Виторио Риго се вратил во Милано на средба со потпретседателот на Милан Адриано Галијани на која дискутирале за некои ситни детали на договорот меѓу Златан и "росонерите" кои наводно преставувале пречка за реализирање на трансферот.
ПСЖ за Ибрахимовиќ треба да плати околу 20 милиони евра, додека на фудбалерот му нуди договор според кој ќе заработува неверојатни 14,5 милиони евра по сезона што ќе го направи втор најплатен фудбалер во светот.