Фудбалерите на Вардар повторно се лидери на табелата во Првата македонска фудбалска лига, откако синоќа на „Филип Втори“ во Скопје во „вечното“ дерби го совладаа Пелистер со 3:1.
Гостите од Битола до 87.та минута имаа позитивен резултат, но тогаш Златко Таневски зголеми на 2:1, а во самиот финиш Јован Костовски го постави конечниот резултат. Претходно, во првото полувреме Вардар поведе со голот на Филип Петров, а на почетокот од вториот дел изедначи Благоја Главевски.
Дербито го одбележаа и неколку инциденти предизвикани од двете навивачки групи, а најголемиот се случи на полувремето кога имаше обид за меѓусебна физичка пресметка. Повеќе вардарови навивачи влегоа на теренот со цел да стигнат до нивните ривали на спротивната трибина но припадниците на МВР реагираа брзо и ја доведоа ситуацијата под контрола. Тогаш гостинските навивачи почна де се пресметуваат со полициските сили, а беа запалени и дел од фрлените хартии на новата атлетска патека при што таа е делумно уништена.
Од МВР информираа дека денеска ќе излезат со детална информација за вчерашните случувања на дербито Вардар - Пелистер.
На другите натпревари од 8.коло во македонскиот фудбалски шампионат постигнати се овие резултати: Напредок - Брегалница 2:1, Тетекс - Металург 0:1, Дрита - Силекс 2:1, Ренова - Шкендија 0:3 и Хоризонт Турново - Работнички 3:0.
Табела: Вардар 19 бодови, Хоризонт Турново 17, Металург 15, Шкендија 14, Напредок 13, Ренова 11, Дрита 11, Пелистер 10, Брегалница 10, Работнички 10, Силекс 4 и Тетекс 3.