Репрезентативецот на Аргентина и играч на Барселона Лионел Меси четврта година по ред е добитник на „Златната топка“.
Фантастичниот аргентински фудбалер го доби признанието на посебната манифестација која се одржа во Цирих.
Тој уште еднаш беше подобар од играчот на Реал Мадрид Кристијано Роналдо, но и од клупскиот колега Андрес Иниеста.
Аргентинскиот ас минатата година ја заврши со неверојатни 91 гол и во моментов води на листата на стрелци во шпанската лига.
- Неверојатно е да се добие оваа награда. Го добив ова признание четврти пат по ред и за тоа сакам да им се заблагодарам на моите соиграчи и на мојот одличен противник Роналдо. Не ги заборавам ниту моите колеги од репрезентацијата и тренерите, но и мојата сопруга и синот. Им должам премногу, изјави Меси кој до наградата стигна со 41,6 % од гласовите. Роналдо освои 23,6 %, а Иниеста 10,9 %.