Фудбалерот на Барселона Џерар Пике поради повреда на грбот нема да биде во тимот кој ќе игра против Реал Мадрид во финалето на шпанскиот Куп на кралот, јавија денеска медиумите во оваа земја.
Пике се повреди пред две недели на првиот четвртфинален натпревар од Лигата на шампионите со Атлетико Мадрид, кога лошо падна при еден воздушен дуел со противнички играч.
Тренерот на Каталонците Херардо Мартино освен на Пике, нема да може да смета уште на еден одбранбен играч, Марк Батра кој исто така е повреден.
Според информациите објавени во шпанските медиуми, во првиот состав на Барселона ќе се врати капитенот Карлес Пујол кој на крајот на сезоната ќе си замине од клубот.
Финалето од Кралскиот куп ќе се одигра утревечер во Валенсија на „Местаља“ со почеток од 21 часот и30 минути.