Тренерот на Атлетико Мадрид, Диего Симеоне денеска изјави дека не е изненаден од тоа што Челзи покажа голем интерес за Диего Коста и додаде дека нема намера да го спречува напаѓачот да го промени клубот.
Шпанскиот весник „АС“ неодамна објави дека премиерлигашот од Лондон наводно постигнал договор со Атлетико Мадрид околу ангажман на Коста, а трансферот треба да се случи на лето и е вреден 60 милиони евра.
- Се зависи од играчот, односно што тој мисли дека е најдобро за неговата иднина. Ќе ја поддржам секоја негова одлука. Нормално е Челзи да покажува интерес за Диего, а за нас тој претставува и голем економски потенцијал. Самуел Ето е веќе во години, а Челзи смета дека Коста е вистинска замена за него. Сепак во моментов тој е наш фудбалер, изјави тренерот на Ателтико.
Во досегашниот тек на сезоната Диего Коста за Атлетико постигна 34 голови на 45 натпревари и има огромен придонес за лидерското место на клубот во Примера и за пласманот во полуфиналето на Лигата на шампионите.
Менаџерот на Челзи Жозе Мурињо неодамна изјави дека му се потребни вистински и квалитетни напаѓачи и индиректно призна дека не е задоволен од прикажаното на сегашните „шпиц-играчи“. Ова изјава најмногу се однесуваше на Фернандо Торес, а како една од опциите се спомнува негово враќање во Атлетико Мадрид.