Велшкиот интернационалец Герет Бејл на финалниот натпревар од шпанскиот куп против Барселона потврди зошто е платен 100 милиони евра од Реал. На Кралскиот клуб му го донесе трофејот со фантастичен гол во финишот на средбата. Пет минути пред крајот на мечот заморот не беше пречка за Велшанецот да претрча 58 метри од теренот и својот чувар Бартра за да го постигне победничкиот погодок. Неговиот одличен спринт се врти и уште долго ќе се врти на најавните шпици на спортските емисии. Статистиката покажува дека Бејл при таа акција трчал со брзина од 27 километри на час.
„Морав многу да се потрудам за голот. Бартра ме истурка и се обиде да ме блокира па морав да го заобиколам за да стигнам пред него до голот. Беше убав гол, но пехарот е уште поубав. Дојдов да освојувам трофеи и се надевам дека ова ќе биде прв од многуте“, изјави Бејл.
Велшанецот од шпанските медиуми го доби прекарот „Кралот Бејл“.
Пред извесно време Бејл постигна одличен гол против Елче, а според „Марка“ по ударот топката патувала со 100,5 км/ч.