Дејвид Мојс од денес повеќе не е менаџер на Манчестер Јунајтед, потврдија од англискиот шампион, на официјалната страница на клубот но и на социјалните мрежи поврзани со овој тим.
Заминувањето на Мојс од позицијата менаџер на Јунајтед дојде по само неколку дена од поразот на Јунајтед од екс клубот на Мојс, Евертон. Клубот на официјалната страница му се заблагодари на Мојс, за напорната работа, чесноста и интегритетот кој го донесе во неговата работа.
По поразот од Евертон изминатиот викенд, Јунајтед падна на 7-та позиција на табелата од Премиер лигата со 57 освоени бода и на само 4 натпревари до крајот. Од 51 натпревар под негово водство во сите конкуренции, Јунајтед победи на 27, изгуби 15, а нерешено одигра на 9 натпревари.
Замена за Мојс до крајот на сезоната во Јунајтед ќе биде Рајан Гигс.