Тренерот на Борусија Дортмунд, Јирген Клоп, категорично ја отфрли можноста клубот да се раздели со големите ѕвезди Матс Хумелс и Марко Ројз, кои се поврзувани со речиси сите европски гиганти. Англиските медиуми објавија дека Хумелс одбил понуда на Барселона, затоа што сака да игра за Манчестер Јунајтед, но и дека наскоро трансферот ќе биде реализиран за сума од 20 милиони евра.
„Нема ни минимален знак дека Матс Хумелс и Марко Ројз сакаат да го напуштат клубот. Двајцата со сигурност ќе играат во Борусија Дортмунд во новата сезона“, изјави Клоп.
„Слушам Хумелс ќе одел во Манчестер за 20 милиони евра. За таа сума нема шанси да го пуштиме“, додаде германскиот тренер.
Ројз беше поврзуван со Барселона, Реал Мадрид, Челзи и покрај повредата која ја заработи пред почетокот на Светското првенство. Засега Дортмунд не планира да го ослободи својот најдобар напаѓач во моментов.