Англискиот репрезентативец Френк Лампард отиде по стапките на Давид Виља и потпиша за Њујорк Сити. Лампард го напушти Челзи по 13 години и се согласи да го облече дресот на новиот клуб од „големото јаболко“ кој ќе дебитира во МЛС лигата идната година.
„Клубот има визија и долгорочен план и јас сакам да бидам дел од него. Мислам дека го одбрав вистинскиот клуб. Поминав убав период во Челзи но сега е време за нов предизвик“, изјави Лампард.
Клубот е во сопственост на англискиот Манчестер Сити и славниот безбол клуб Њујорк Јенкис на чиј стадион Њујорк Сити ќе ги играат домашните натпревари. „Небесно-сините“ претходно потпишаа договор со Давид Виља кој замина да игра за Мелбурн Сити додека не почне сезоната во САД.