Медиумите во Италија објавуваат дека поради бирократски проблеми екипата на Гуангжу од Кина не успеала да го добие потписот на Горан Пандев од Наполи. Кинезите, на чија клупа е славниот Марчело Липи, имале астрономска понуда за услугите на нашиот најдобар фудбалер, но проблемите настанале откако не успеале навреме да направат слободно место за нов странец во тимот.
„Јас сум во Наполи и имам договор со оваа екипа на уште една година. Тренирам со екипата, играм тест натпревари... Ако има нешто ниво тоа ќе биде во последните денови од преодниот рок“, ни истакна Горан Пандев во неделата кога го прослави 31. роденден.
За услугите на Горан Пандев најзагреани се од Фиорентина, кои чекаат на милост од Наполи, кој треба да ја намали сумата за отштета кога треба да се плати за слободата на фудбалерот.
Бенитез: Пандев е голем играч
Дека Горан Пандев не е оптоварен со трансфер по секоја цена говори и изјавата на тренерот Рафа Бенитез. Шпанецот вчера на прес-конференција одговорил директно за иднината на Пандев.
“Горан Пандев е голем играч. Неговите квалитети не се спорни. Сепак, преодниот рок сè уште трае и не би било ништо чудно ако остане со нас. Има и други екипи со 4-5 напаѓачи во составот. Сезоната е долга...“, е изјавата на Бенитез поврзана за Пандев.
За Пандев настанаа проблеми по ангажманот на Мичу од Свонси, но последните вести говорат дека Каљехон се скарал со Бенитез и побарал да си замине од екипата.