Позитивните реакции од користењето на спрејот за обележување на местото каде што треба да биде формиран живиот ѕид и понатаму се присутни во лигите низ Европа. Ова се прифаќа во повеќето од посилните лиги, па по Лигата на шампионите и Примера, сега се најавува користење на спрејот и во Англија.
Раководството на Премиер-лигата веќе даде одобрување, па сосема извесно е дека во новата сезона фудбалерите нема да можат да крадат простор при изведувањето на слободните удари.
„На Мундијалот во Бразил стана јасно дека спрејот е добро средство за судиите и за фудбалерите, но и за фановите кои гледаат пред ТВ екраните. По договорот со клубовите одлучивме да го воведеме и кај нас, па во новата сезона ќе им биде помош на судиите“, вели директорот на Премиер лигата, Ричар Скјудмор.