*Нашиот најдобар фудбалер речиси е пред трансфер во Турција. Горан Пандев потпишува договор на три години со тимот од Истанбул
Понуда која не се одбива доби Горан Пандев од Галатасарај. Македонецот е пред трансфер во трофејниот клуб од Турција каде заминува како големо засилување пред стартот на новата сезона и настапите во Лигата на шампионите. Договор на 3 години, годишна плата од 3.000.000 милиони евра и отштета од 7.000.000 евра за Наполи. Турците даваат „азно“ за да го обединат шампионскиот тандем на Мурињо од времето кога славниот тренер со Интер направи „лом“ пред 4 сезони и ги собра сите можни клупски пехари. Снајдер-Пандев повторно заедно, а на клупата Чезаре Прандели, довчерашниот селектор на Италија.
Дека Пандев е пред трансфер во Турција говори и податокот дека тој веќе три дена не е со Наполи на подготовките. Има ситна повреда, дојде кратко во Струмица, но имал и преговори со менаџерите и претставниците на клубот од Истанбул.
Парите на Галатасарај се пред сите понуди и комбинации за Пандев ова лето. Милан сериозно „напаѓа“ но нуди договор на една година, а Пандев инсистира да замине во клуб каде би останал на подолго. Затоа фудбалерот и менаџерите не инсистираа на трансфер и најавуваа дека постојат големи шанси да се одработи договорот со Наполи, кој истекува во јуни 2015 година а потоа како слободен игран нашиот голгетер да замине во нова клупска средина. Според тоа како стојат работите во наредните 10 дена ќе се знаат сите детали поврзани за Пандев и дилемите околу тоа каде тој ќе настапува во новата сезона. Галатасарај сега е во преден план.