Аргентинецот Анхел ди Марија продолжува со седумката во Манчестер Јунајтед, а играчот се збогуваше со фановите на Реал Мадрид со писмо во кое ја објасни причината за заминувањето.
Покрај писмото во јавноста има и изјави од неговиот татко кој вели дека во Реал Мадрид не знаеле да го ценат неговиот син.
„Анхел не беше воопшто ценет во Реал Мадрид. Таму го третираа како вишок. Тој не се чувствуваше дека е посакуван во клубот. Едноставно никогаш не доби топол однос од никого во Реал Мадрид. Тој секогаш се бореше за своето место, а таму, пак, постојано купуваа фудбалери кои го вадеа од составот бидејќи мораа да играат за да се оправдаат парите. Таков беше случајот со Герет Бејл. Мојот син се замори да се докажува и да се бори. Тој веќе има покажано сè и затоа едноставно мораше да најде клуб каде што ќе игра“, вели Мигел ди Марија.
Тој воедно дополни и за парите кои ги добиваше во Реал Мадрид.
„Во овој клуб никогаш не му понудија шест милиони евра по сезона. Последната понуда беше во износ од пет милиони. Тоа беше за 1,5 милиони повеќе од она што претходно го добиваше. Реал загуби многу бидејќи остана без играч кој во секој момент може да донесе победа во натпревар“, вели Мигел.