Денеска, точно на пладне, во хотелот „Плаза“ во Скопје селекторот Бошко Ѓуровски ќе ја има првата прозивка на националниот тим за дуелите со Луксембург и со Украина. Од сите повикани репрезентативци ќе недостасува само Мирко Ивановски, кој денеска има меч со Клуж во романскиот шампионат и на репрезентативците ќе им се приклучи утре.
„Мирко Ивановски пријави дека ќе доцни поради обврски со клубот. Неговото доаѓање го очекуваме утре“, ни изјави селекторот Бошко Ѓуровски.
ФОРМАТА ГО РАДУВА СЕЛЕКТОРОТ
Предводникот на нашиот национален тим ја следи формата на репрезентативците и е среќен што повеќето од избраниците играат во своите клубови.
„Добро е тоа што 90% од повиканите играат во своите клубови и ме радува нивната форма. Единствено имаме тројца кои не играат. Станува збор за Пачовски, Ристовски и Спировски, меѓутоа верувам дека се во форма и дека ќе одговорат на предизвикот за двата меча. Формата е многу важна на вакви мечеви. Едно време имавме проблеми со таа минутажа, но сега сум среќен што речиси сите играат. Собирот е денеска, во 12 часот, освен Ивановски сите би требало да бидат присутни денеска на собирот“, потенцираше Ѓуровски, кој потврди дека на местото на Глишиќ повик доби Езџјан Алиоски.