Комесарот за безбедност на ФС на Србија, Миливој Мирков, истакна дека навивачите на Албанија дефинитивно не можат да присуствуваат на натпреварот против Србија во Белград во квалификациите за ЕП и дека секој поединец ќе биде уапсен.
„Навивачи на Албанија нема да има на стадионот бидејќи нивниот сојуз ја прифати препораката на Европската фудбалска унија (УЕФА). Билетите кои ги добија ќе ни бидат вратени и на натпреварот ќе присуствуваат само домашни навивачи. Секој Албанец кој ќе биде на стадионот (со навивачки обележја) ќе биде отстранет и потоа процесуиран во рамките на законот“, изјави Мирков.
ФСС првично предложи на албанскиот сојуз двата меча да се играат без публика, што Албанците го одбија па на крајот беше известена УЕФА. Претставниците на ФСС не можеа да гарантираат безбедност на гостинските навивачи бидејќи Албанците не сакале да достават список на имиња и презимиња на навивачите иако е тоа по прописите на УЕФА. Мечот се игра во вторник на стадионот на Партизан.