И покрај договорот меѓу Фудбалските сојузи на Србија и на Албанија да нема гостински навивачи на нивните меѓусебни дуели, стотина навивачи на албанската репрезентација го најавија своето присуство на вечерашната средба во Белград.
- Албанскиот сојуз се согласи да не дозволи организирано водење на навивачи, па ние билети ќе набавиме во Белград. Таму ќе не има стотина од нашата група. Ќе ги носиме нашите препознатливи црвено-црни маици. Не се плашиме. Нека не уапсат, изјави Алберт Кастрати, водачот на навивачката група на Приштина.
Албанските медиуми тврдат дека и други навивачи на Албанија, од јужниот дел на Србија ќе направат обид да присуствуваат на натпреварот прогласен од висок ризик.
Од друга страна, Комесарот за безбедност на ФС на Србија Миливој Мирков потенцира дека секој навивач на Албанија кој ќе успеа да стигне до стадионот од страна на службите за одржување на редот ќе биде отстранет и процесиран за понатамошна постапка.
На социјалните мрежи веќе се појавија фотографии со навивачи од пред стадионот на Партизан во Белград кои носат албански обележја.
Вечерашниот натпревар во Белград меѓу Србија и Албанија од квалификациите за ЕУРО 2016 ќе почне во 20 часот и 45 минути.
