Повредата е минато за Агим Ибраими, фудбалерот кој вечерва се очекува да настапи во првите 11 на Марибор на гостувањето во Лондон кај еден од претендентите за освојување на пехарот, тимот на Челзи. Жозе Мурињо ќе има можност да се увери во квалитетите на македонскиот интернационалец кој сезонава пишува историја со Марибор. Игра за првпат во Лигата на шампионите и ќе го забележи својот трет настап. Ибраими веќе имаше гостување со Марибор во Лондон во Лигата на Европа кога играше против Тотенхем кога загуби со 3:1 на „Вајт Харт Лејн“. Ибраими ги одигра сите 90 минути во таа пресметка.
„Кој не би сакал да го тресе тимот на Мурињо на негов терен. Се разбира дека Челзи е фаворит но ние покажавме на изминатите два меча дека можеме да играме успешно во ова големо натпреварување. Се радувам што повторно ќе играм против Цеск Фабрегас со кого имав некои препирки на средбата Шпанија - Македонија“ ни изјави Ибраими.
Инаку на нашиот напаѓач добро игра на островот. Можеби затоа е и понудата на Лидс од 1.500.000 евра за услугите на напаѓачот на Марибор
До сега Марибор нема пораз во ЛШ откако одигра 1:1 против Спортинг Лисабон дома, но и со ист резултат со Шалке на гостински терен. Утре Пандев со Галата го пречекува тимот на Борусија Дортмунд.