Поранешниот фудбалер на Реал Мадрид и Шалке 04, Раул одлучи да се активира, а кариерата ќе ја продолжи во редовите на Њујорк Космос. Тој беше во пензија откако се збогуваше со Ал Ахли, но сега одново му се враќа на фудбалот.
Раул сè уште е стрелец број 1 во Лигата на шампионите, но наскоро ќе го загуби врвот од Роналдо или од Меси. Сепак, тоа во случајов не е во прв план бидејќи тој сега ќе игра во САД каде што се очекува да придонесе за напредок на клубот.
„Њујорк Космос може да објави дека поранешниот капитен на Реал Мадрид и на Шпанија, Раул Гонзалез Бланко ќе потпише неколкугодишен договор со клубот за да може да учествува во првенството во 2015 година. Секако прво постои услов успешно да ги мине лекарските прегледи“, се вели во соопштението кое е објавено од страна на клубот.
Покрај тоа што Раул ќе биде големо засилување за Њујорк Космос на теренот тој ќе има и улога на технички советник, а кога ќе одлучи да се повлече од играњето ќе продолжи да работи како тренер во академијата.
„Секој во светот на фудбалот го знае името на Космос. Ја знае и историјата на фудбалерите кои играле за екипата пред тоа. Тие помогнаа фудбалот да дојде во Америка и јас сум горд што ќе ги следам нивните стапки. Верувам во визијата на овој клуб и сум горд што сум дел од него“, изјави раул.
Пред два дена Раул прослави 20 години од почетокот на професионалната кариера во која дури 16 сезони ги мина во Реал Мадрид. За овој период Раул одигра 741 натпревар, а постигна 323 гола. Потоа по две сезони мина во Шалке 04 и Ал Сад од Катар.
Инаку, во Њујорк Космос во минатото имаше многу прославени имиња на фудбалот, а меѓу нив секако најголеми беа Пеле и Франц Бекенбауер, кои оставија голема трага во седумдесетите години на минатиот век.