Раководството на Барселона направило голема грешка бидејќи во 2011 година имала можност да донесе двајца одлични фудбалери кои сега се наоѓаат во првите постави на Челзи и Реал Мадрид. Таткото на Кркиќ, Бојан Кркиќ-сениор во таа година бил скаут на Барселона и им ги понудил Тибо Куртоа и Рафаел Варан.
Во интервјуто кое го даде за неколку шпански медиуми Кркиќ објаснува дека тој разговарал со челниците на клубот. Воедно им кажал дека Куртоа и Варан се големи таленти и дека може да сметаат на долг период. Сепак, пораката не била прифатена, па Куртоа подоцна заврши во редовите на Челзи, а Варан во Реал Мадрид.
„Гледавме многу видеа од Куртоа. Бев многу изненаден од неговите квалитети и дефинитивно знаев дека ќе биде одличен како што ќе одминува времето. Тој самиот имаше желба да дојде во Барселона. Дури беше подготвен да игра во во Барселона Б или да замине на позајмица додека да ја добие вистинската шанса. Сепак, не се случи ништо од ова, а потоа Куртоа потпиша за екипата на Челзи“, вели Кркиќ-сениор.
Во однос на Варан за неговата игра немало доволно позитивни оценки така што во моментите додека играл за Ленс не ги задоволил скаутите.
„За Варан приказната е друга. За него бев известен во момент кога тој играше како дефанзивен играч за врска. Тогаш ми беше кажано дека се работи за одличен фудбалер пред кого е голема иднина и затоа го препорачав на Барселона и ги известив раководните лица дека треба да го држат под око. Барселона поради ова испрати свои скаути да го следат на дуелот меѓу Ленс и Монако. Сепак, на тој меч Варан не се претстави во најдобро светло, а оценките не беа позитивни, па затоа не се случи ништо“, вели Кркиќ.
Подоцна Варан дојде во Реал и тоа додека Мурињо беше тренер. Тој му даде шанса, а Варан сега полека го добива и своето место кај Анчелоти.
Доколку Барселона го послушаше Кркиќ-сениор тогаш во текот на летото немаше да има никаков проблем за голманската позиција и за стоперското место. Куртоа ќе го заменеше Валдес, а Варан ќе се најдеше на местото каде што беше ангажиран Матје.