Најтрофејниот италијански клуб Јувентус гостува кај Каљари во обид да стави крај на најлошата серија без победа годинава. „Старата дама“ за првпат во 2014 година е во низа од три меча на кои нема победено. Од почетокот на декември, шампионот се нема израдувано на триумф, но интересно е и тоа што нема загубено. На гостувањето кај Фиорентна одигра без голови, а 0:0 заврши и мечот со Атлетико Мадрид во Лигата на шампионите. Јувентус во неделата ја прекина и едно и полугодишната доминација пред своите навивачи во првенството, откако одигра 1:1 во дуелот со Сампдорија.
„Имавме три тешки дуели и најважно е што не загубивме. Сепак, сега треба да се фокусираме на следните мечеви и треба да се обидеме да го сочуваме лидерското место. Сезоната е долга и никако не смееме да дозволиме да ни падне концентрацијата“, вели дефанзивецот на Јуве, Андреа Барзаљи.
И покрај овие резултати, Јувентус уште е лидер во првенството, но сега има само еден бод пред Рома, која му е единствен ривал во трката за шампионскиот трофеј во Серија А. На осум од последните 10 мечеви со Каљари, Јувентус има осум победи и две нерешени. Каљари на победа се нема израдувано од ноември 2009 година. Иако се домаќини, во Каљари знаат дека ќе им биде многу тешко да се надеваат на успех против фаворитот. Тимот од Сардинија сезонава е слаб и моментно е на позиција која не му гарантира опстанок во лигата.