Куферите на Горан Пандев се веќе спакувани. Од Истанбул Македонецот заминува во Милано каде што ќе биде неговата следна дестинација. А дали клубот ќе биде од овој град, останува да се види. Важно е дека се враќа во градот каде што живееше две години додека беше дел од Интер со кого ги направи и најголемите успеси во својата кариера. И претходно беше член на „сино-црните“ од Милано, но немаше место па беше позајмуван на пониско рангирани тимови, за потоа одново да се врати во таборот на „нероаѕурите“. Ја освои со нив шампионската титула во Италија, како и онаа Европската, а потоа се пресели во Наполи.
ДА ЗАВРШИ ЕСЕНСКИОТ ДЕЛ И ТОЛКУ
Галатасарај до крајот на есенскиот дел има уште два првенствени меча или вкупно четири натпревари. Тешко дека Пандев ќе ги дочека сите затоа што можно е да си замине уште пред финишот на есенскиот дел. Галата игра со Мерсин и со Генчлербирлиги во рамките од првенството, и два дуела од Купот против Дијарбакир. Голема е веројатноста Пандев да дочека само да заврши шампионатот и да си замине од Турција како слободен играч иако има договор до 2016 година со „жолто-црвените“.