Пандев почна да ја оправдува довербата, и по трите гола во Купот, завчера постигна уште еден што наиде на пофалби од страна на неговиот тренер
За само неколку дена Пандев покажа дека е вистинско засилување за Галатасарај. И покрај тоа што наиде на серија критики од страна на медиумите, сепак, во Купот стана херој, и по трите гола на дуелот со Балчова, даде уште еден во мечот со Дијарбакир. И во двата натпревари Галатасарај дојде до убедливи победи, а добрата серија и форма на Пандев наиде на пофалби од страна на неговиот тренер Хамза Хамзаоглу.
„Задоволен сум од формата на Пандев, иако јас сум сигурен дека тој може многу повеќе ако успее да ја подобри физичката кондиција. Среќен сум поради него што конечно влезе во форма, онаква каква што посакував“, рече Хамзаоглу.
ПОНУДИ СЕКОГАШ ЌЕ ИМА
Во текот на преодниот рок Пандев, најверојатно, ќе си замине од Галатасрај и ќе се врати во Италија. Со тоа неговата епизода во Истанбул ќе трае многу кратко. Хамзаоглу на оваа тема само кратко искоментира:
„Ако неговата желба е да си замине, тогаш ние не можеме против тоа. Ќе се обидеме да го задржиме, меѓутоа нема да биде лесно. Понуди за нашите играчи секогаш ќе има“, рече Хамзаоглу.