Фудбалската федерација на Италија ја разгледува можноста на екипата на Јувентус да и бидат вратени двете одземени титули шампион на Италија.
Претседателот на федерација Карло Тавекио изјави дека ќе размисли за враќањето на тутулите само доколку „Старата дама“ ги повлече тужбите за обесштетување во износ од 443 милиони евра.
- Бев еден од ретките навивачи на Интер кој никогаш не го навредил Јувентус кога победуваше. Она што ме мачи е тужбата на Јувентус и тоа е голем проблем. Како да се договорам со некој кога ме тужи за 443 милиони? Сакам случајот да го решиме, бидејќи во спротивно Федерацијата ќе банкротира, изјави Тавекио за италијанскиот весник „Тутоспорт’’.
По големиот скандал „Калчополи“ во 2006 година, кој го потресе италијанскиот и светскиот фудбал, најтрофејниот италијански тим беше исфрлен во „Серија Б’’ и му беа одземени две титули, откако поранешниот генерален директор Лучиано Моџи беше обвинет и осуден за близок однос со судиската организација и местење на натпревари.
Во меѓувреме Моџи беше ослободен од две обвинувања во врска со „Калчополи“ за што првобитно доби две години и четири месеци затвор, додека третото обвинение е отфрлено поради застареност.
Според најновата пресуда на цивилниот и судот за спортски криминал, гигантот од Торино побарува оштета од 433 милиони евра и враќање на двете титули од страна на Фудбалската федерација на Италија.
Првиот човек на Федерацијата, истакна дека претседателот на Јувентус, Андреа Ањели е подготвен за договор, но и дека разговорите се уште не се започнати.