Доколку Двејн Вејд летово го напушти Мајами хит, а има таква опција во договорот, негова следна дестинација би можела да биде Лос Анџелес лејкерс. Според некои најави, постои интерес и кај двете страни за евентуална соработка. Но, сите овие комбинации ќе важат ако Вејд не го добие посакуваниот повеќегодишен договор со Хит.
Познавачите сметаат дека Лејкерс не може да му понуди на Вејд поголеми шанси за победување, особено што тимот е од посилната западна конференција. Но, Лејкерс има многу пари за трошење и секако можноста да живее во Лос Анџелес е привлечна за сите, па тоа се адутите на „езерците“.
Вејд на 1 јули можеби ќе стане слободен агент, Мајами нема уште многу време за губење во преговорите и треба брзо да реагира ако сака да го задржи бекот во своите редови. Има сигнали дека Вејд сериозно размислува за заминување од клубот чиј дрес го носи во својата цела досегашна НБА кариера, а тоа се 12 сезони. Лејкерс го чека со раширени раце и трансферот би можел да се оствари.
Ако Мајами остане без Вејд, тоа би било катастрофа за клубот кој лани остана без Леброн Џејмс и резултатски и финансиски драстично падна. Вејд за „жешките“ е значаен како Коби Брајант за ЛА Лејкерс или Тим Данкан за Сан Антонио спарс. Ако ја загубат својата ѕвезда поради неколку милиони долари, би можеле да имаат долготрајно последици и во иднина. Некои аналитичари сметаат оти идеално за Вејд би било да замине во клуб каде би имал улога на шести играч. И во Лејкерс тој би можел да биде резерва и да дава голем придонес, но само ако Коби биде здрав.