Крилниот центар на рускиот евролигаш Локомотив Кубан, Ричард Хендрикс, ќе биде натурализираниот кошаркар во репрезентацијата на Македонија на претстојното Европско првенство (ЕП), што, пак, значи и дефинитивен крај на надежите за камбек во националниот тим на некогашниот херој Лестер Бо Мекејлеб, дознава „Спортмедиа" од извори блиски до „жолто-црвениот" состав.
Двајцата Американци се најдоа на поширокиот список на селекторот Александар Џикиќ и редовно беа во контакт со новиот спортски директор на Македонската кошаркарска федерација, Заре Марковски.
Но, неодамнешното официјално откажување на Ѓорѓи Чековски од репрезентацијата и најавите од Перо Антиќ дека нема намера да игра на континенталниот собир, направија предводникот на националниот тим да има поголема потреба од високиот Хендрикс отколку од плејмејкерот Мекејлеб .
Нашите кошаркари на претстојното ЕП се наоѓаат во групата Ц која се игра во Загреб, а во која уште се и Хрватска, Словенија, Грција, Холандија и Грузија. Првиот круг го почнуваме на 5-ти септември против јужниот сосед, а ја завршуваме на 10-ти септември против словенечкиот состав.
Пласман во следната фаза, која според нокаут-систем ќе се игра во францускиот град Лил, ќе обезбедат четирите најдобри селекции од секоја група.