Со секој одминат ден екипата која во изминатите четири селекции важи како најдобра во нашата земја го добива оној финале лик. Секако во поглед на креирањето на екипата што треба да го одбрани шампионскиот трофеј, а во исто време и да биде место повисоко на табелата во АБА Јадранската лига.
Па така, само еден нецел ден откако беше официјализирано продолжувањето на соработката со Дамјан Стојановски, челниците на клубот од Аеродром договорија уште едно, овој пат странско засилување.
Ново име во составот кој и догодина ќе го предводи Словенецот Алеш Пипан е босанскиот интернационалец Душко Буниќ (207см-1989год).
Еден би се рекло веќе искусен кошаркар, кој во својата кариера има освоено и златен медал со српската репрезентација, и тоа на Универзијадата во 2011 година, а во Скопје доаѓа од редовите на шампионот на БиХ, Игокеа, а кој претходно има настапувано и во Будуќност од Подгорица, новосадска Војводина, Металац и Спартак од Суботица.
Како играч на Игокеа овој корпулентен кошаркар лани одигра 25 мечеви во Лигата на Јадранот и притоа реализираше просечни 10.8 поени, и 5.4 скокови.
А неговите бројки беа уште повисоки кога се зборува за Премиер-лигата на БиХ затоа што на 15 од нив Буниќ имаше просек од 11.6 поени и 5.7 скока, но и процент на реализација од поле од високи 68.5%.
Друштво во новата средина, исто така „сино-бела“, на Буниќ во наредниот период ќе му прави неговиот соиграч од Игокеа, Ѓорѓе Дрновац, кој исто така ова лето стана нов играч на македонскиот првак.