Раководството на НБА лигата додаде неколку дена во распоредот на големото финале, па сега во 2016 година, помеѓу секој меч во серијата кога ќе има патување, ќе има два слободни дена. Идејата на комесарот Адам Силвер е играчите да добијат нешто повеќе одмор. Според предвидениот редослед, финалето во 2016 година ќе почне на 2 јуни, и ќе заврши најдоцна на 19 јуни.
Од минатата сезона во финалето се врати форматот 2-2-1-1-1, откако во претходните 30 години се играше 2-3-2 со цел да нема толку многу патување од западната до источната страна од САД и обратно.
Со новиот календар, за еден ден се поместуваат третиот и петтиот меч. Годинава екипите имаа само еден слободен ден кога се селеа во другиот град по вториот меч од финалната серија, и повторно играа во првата ноќ по пристигнувањето. Финалето можеше да трае најмногу 14 дена со стариот формат 2-3-2, а во минатата сезона од првиот до потенцијално седмиот меч имаше 15 дена.
Во 2016, финалето стартува на 2 јуни, а наредните средби се закажани за 5 јуни, 8 јуни, 10 јуни, 13 јуни (ако има потреба), 16 јуни (ако има потреба) и 19 јуни (ако има потреба).
Истотака, во НБА мислат и на поголема заштита на играчите и во регуларната сезона. Намален е бројот на мечеви кои екипите ќе ги играат два дена по ред, или четири дуели за пет дена.