Коби Брајант не е сигурен дека по завршувањето на оваа сезона ќе стави крај на својата играчка кариера, но испрати порака дека нема намера да го напушти Лос Анџелес лејкерс. „Многу кошаркари кои се при крај на кариерата сакаат да одат во посилни тимови за да се борат за титула, но јас не сум таков. Јас сум Лејкер и во добро и во зло и таков ќе останам до крај“ - порача Брајант од Хонолулу на Хаваите каде тимот е на подготовки.
Претседателот на Њујорк никс, Фил Џексон, кој како тренер на Коби и Лејкерс освои неколку титули, неодамна рече дека мисли оти Брајант ќе потпише за друг клуб, откако ќе му истече договорот со „езерџиите“ во летото 2016.
„Мислам ова нема да му биде последна сезона во кариерата, но ми се чини дека ќе му биде последна како член на Лејкерс“ - рече Џексон.
Брајант има 37 години и влегува во својата 20-та сезона како играч, а годишната плата ќе му биде 23,5 милиони долари. Затоа тој сакаше да му одговори и на Џексон и на сите други кои сметаат оти ќе си замине.
„Колку пати треба да кажам дека јас сум Лејкер во срцето. Во мене тече виолетово-златна крв“ - тврди Коби, кој сака да ги продолжи стапките на славните Меџик Џонсон, Џери Вест и Џејмс Ворти кои целата кариера играа само за Лејкерс.
Најголем проблем за Коби се повредите. Во минатата сезона пропушти 47 меча, во сезоната 2013/2014 играше на само шест средби, а сезоната 2012/2013 му е последна во која играл повеќе од пола сезона. Последниот официјален меч што го одигра е на 21 јануари кога го повреди рамото, па беше опериран, и оттогаш нема играно кошарка „пет на пет“ со контакт со противник.