ФИБА ја стави Македонија на 34. место во светот и 13. во ЕвропаМакедонската сениорска репрезентација е поставена на 13. позиција во рангирањето кое по завршувањето на Евробаскетот и другите регионални шампионати ширум светот го направи светската кошаркарска федерација.
Учеството на Европското првенство, кое за нас почна и заврши во групата „Ц“ во Загреб, од ФИБА е карактеризирано со еден освоен бод во пласманот. Или вкупно 27. во рејтингот, доволни за 13. позиција во европската класификација, или, пак, 34. на светско ниво.
Тоа индиректно значи и поместување за две места подолу во однос на претходното броење на бодовите од страна на ФИБА.
Место кое, сепак, нè става пред селекции како Италија, Израел. Летонија, кои имаа далеку подобро издание од нас на Евробаскетот кој за прв пат се играше во четири различни земји.
Според новиот поредок на ФИБА, новиот европски првак, Шпанија, е недостижна за конкуренцијата.
„Црвената фурија“ има дури 715 поени, што е многу повеќе во одмос на Литванија (457), која направи скок од една позиција, но и од Франција, која е трета со 379 бодови, и Србија која се приближи кон самиот европски врв, со 353.
Гледано во светски рамки, Шпанија и Литванија се двете селекции кои им се доближија на неприкосновените Американци кои водат со точно 1.000 поени.
Помеѓу двете европски сили се наоѓа Аргентина (455). А во ТОП 5 се и „триколорите“, додека европската доминација ја прикажуваат и Србија, Русија, Турција и Грција кои се во првата „десеторка“.
Онаа во која како деветтопласиран се најде Бразил, домаќинот на следниот голем кошаркарски настан, Олимпијадата.
СЛИКА: МАКЕДОНИАЈ ГРУПА
За една победа во Загреб, добивме само еден поен од ФИБА
СВЕТСКИ РЕЈТИНГ
1. САД 1.000
2. Шпанија 715
3. Литванија 457
4. Аргентина 455
5. Франција 379
6. Србија 353
7. Русија 305
8. Турција 281
9. Бразил 273
10. Грција 225
-------------------------
34. МАКЕДОНИЈА 27
|