Турскиот гигант Фенербахче, чиј член е македонскиот крилен центар Перо Антиќ, вечерва гостува кај НБА тимот Оклахома Сити тандер во егзибициски меч. Тоа ќе биде прв меч против една НБА екипа за Антиќ по заминувањето од Атланта хоукс. Противникот не е било кој, туку „громовите“ од Оклахома кои сега се комплетни по враќањето на нивната прва ѕвезда Кевин Дурант. Дурант нема играно пред своја публика уште од февруари, па сигурно ќе биде мотивиран да прикаже добра игра.
Фенербахче славеше над Бруклин нетс на првиот меч од американската турнеја (Антиќ не играше поради недоволно залечена повреда, но најавите се дека вечерва ќе добие одредена минутажа), а сега ќе има потешка задача. Тандер завчера гостуваше кај Минесота тимбервулфс.
По осуммесечна пауза и три операции на стапалото, се врати Дурант, кој за 22 минути имаше 15 поени и четири асистенции.
„Се чувствувам добро. Беше малку поразлично, малку сум излегол надвор од таа рутина пред мечот. Но, кога стапнав на терен, се чувствував супер, како да сум дома на своја територија“ - рече Дурант, кој немаше играно од 19 февруари и ги пропушти последните 28 меча во минатата сезона, и тешко му беше да гледа како Тандер првпат по пет години не влезе во плејофот.