Шарлот хорнетс го победи ЛА Клиперс со 106:94 во контролен дуел одигран во кинескиот град Шенџен. Коди Зелер и Џереми Лин со по 16 беа предводници на „стршените“, кои во своите редови имаа седум играчи со двоцифрен број поени. Кај Клиперс го немаше главниот плејмејкер Крис Пол кој во саботата на тренинг се здоби со фрактура на показалецот на левата рака.
Хорнетс во претсезоната има 3-0, а на трибините во салата во Шенџен седеше и сопственикот на клубот, Мајкл Џордан. Инаку, публиката во овој град во јужниот дел на Кина за првпат имаше можност да гледа меч на две НБА екипи.
Клиперс и Шарлот меѓусебе ќе одиграат уште еден пријателски меч на кинеска територија, и тоа вечерва во „Мерцедес Бенз арената“ во Шангај.