Бранителот на титулата во домашниот шампионат, екипата на МЗТ Скопје во одбрана на насловот ќе мора да продолжи без еден од своите најдобри кошаркари во оваа сезона - Марко Луковиќ.
Високиот српски кошаркар не го дочекал крајот на еден од тренинзите. При еден незгоден пад на паркетот во СЦ „Јане Сандански“, лекарите констатирале дека има скршеница на десната рака односно десната подлактица.
Првичните лекарски прогнози се дека раката на помладиот од браќата Луковиќ ќе биде имобилизирана во следните три до четири недели. Дури потоа следува и едномесечна рехабилитација, што најверојатно ќе означи и крај на сезоната за високото крило на „металците“.
Момент кој и дефинитивно е голем проблем за стручниот штаб на „сино-белите“ не само во оваа фаза последна од регуларниот дел, туку и во плеј-офот каде МЗТ Скопје ја брани титулата.
Затоа е многу извесно дека неговото место во тимот, оној стартниот, тренерот Александар Јончевски ќе го пополни со уште еден висок (и корпулентен) кошаркар каков што несомнено е Душко Буниќ, кој важи како играч за позицијата „4“, која на малку поинаков начин успешно ја пополнува(ше) и Марко Луковиќ.
А со оглед на бројот на странски играчи во составот на МЗТ Скопје (осум), тоа индиректно значи дека на следните средби „ротацијата“ же биде пократка за еден играч.
Инаку во досегашниот дел од домашниот шампионат Луковиќ реализираше просечни 12. поени, 6.6 скока и 2.2 асистенции. Додека пак претходно во настапите во АБА лигата високото крило беше на слични бројки, односно 11.8 поени, 5.9 скока, и 2.2 асистенции за нецели 29. минути поминати во игра.