Екипата на Фенербахче е нов првак на Турција откако со 4-2 во победи, во финалната серија го совлада Анадолу Ефес. Четвртата победа, која беше извојувана синоќа, Фенер ја оствари со стил и тоа пред своите навивачи. „Пиварите“ беа разбиени со 91:70, пораз кој беше ублажен во последната четвртина откако по три квартали предноста на Фенербахче беше огромни 35 поени разлика.
Македонскиот центар Перо Антиќ повторно не беше во составот на Фенербахче, кој сезонава ја завршува со двојна круна во Турција и пласман во финале на Евролигата.
За Фенербахче ова е прва титула по онаа во сезоната 2013/2014, кога „жолто-сините“ истотака во своите редови имаа еден кошаркар со македонски пасош (Бо Мек Кејлеб).