Ол-стар бекот на Хјустон рокетс, Џејмс Харден (26), се согласи на нов четиригодишен договор со клубот, и за тоа ќе добие 118 милиони долари. Со новиот договор, Харден може да искористи опција да биде слободен најрано во летото 2019 година. Со ова, клубот си се обезбеди со присуство на лидер околу кој ќе може да го формира тимот во иднина. Според визијата на тренерот Мајк Дантони, Харден им е потребен на „ракетите“ и тоа на подолг рок.
Харден дојде во Хјустон во 2012 година од Оклахома сити, а во 2015 беше предводник на Рокетс до пласман во финалето на западната конференција.
Продолжувањето на договорот на Рокетс со Харден е изненадување, а беше објавен за време на прес-конференција на која клубот ги претстави новите свои играчи Рајан Андерсон, Ерик Гордон и Нене Иларио.
Стариот договор на Харден беше со важност до 2018 година, и со наредните две години требаше да земе вкупно 34,6 милиони долари. Со новиот дил, неговата годишна плата ќе биде зголемена за 10-11 милиони. Во последната сезона од договорот, 2019/2020, Харден ќе има плата од 32,7 милиони „зелени банкноти“. Вкупно, Рокетс на Харден за наредните четири години ќе му исплати 83,5 милиони долари повеќе од планираното.