Екипата на МЗТ Скопје во октомври, месецот во кој почнува официјалната сезона, ќе одигра 10 натпревари, што значи дека во просек тимот на тренерот Емил Рајковиќ ќе има средба на секои три дена. Овој напорен ритам не е ништо ново за МЗТ бидејќи во минатата сезона тимот во октомври одигра дури 11 меча. Разликата е што лани мечевите во октомври беа од АБА лигата и домашната лига, а сега сите ќе бидат против странски екипи и ќе има повеќе патувања.
Од десетте меча кои МЗТ ќе ги игра во октомври, по пет се на домашен терен и на гости. Гостувањата се во Белград, Загреб, Малага, Задар и Сремска Митровица. Од 1 до 10 октомври, ќе се играат четири кола во Јадранската лига. Врзаните гостувања, дуелите со Уникаха и Задар се во рок од три дена, па така веројатно „металците“ од Шпанија ќе треба директно да патуваат до Хрватска. Најмалку патувања во октомври МЗТ ќе има од 19 до 26, кога ќе игра три меча, но сите во „Јане Сандански“.
За ноември, МЗТ има закажано девет средби од кои пет се во Еврокупот, а четири во АБА лигата. Во декември, МЗТ ќе бидат далеку порастоварени, бидеји ќе играат само шест меча, четири во АБА и последните два од групната фаза во Еврокупот.
На стартот на минатата сезона македонскиот првак во октомври имаше дури осум настапи во АБА лигата, и уште три на домашна сцена. Сезонава МЗТ нема да игра во првата фаза од македонската прва лига, туку ќе се приклучи подоцна.