Соединетите Американски Држави на убедлив начин го освоија златниот медал во кошарка на Олимписките игри во Рио. Тие синоќа во финалето со 96:66 ја победија Србија и ја потврдија својата доминација во овој спорт.
Српските кошаркари ја немаа можноста како на средбата во рамките на групната фаза, кога резултатски беа близу до фаворитот, а дури имаа и шут за продолжение. За разлика од тој дуел, во финалето „дрим-тимот“ одигра агресивно во одбраната и ефикасно во нападот доволно за убедлив триумф.
Само во првата четвртина се одржуваше некаква неизвесност (19:15), а потоа следуваа „фуриозни“ десет минути (33:14) по што победникот беше решен уште на полувремето.
Кевин Дурант со 30 поени беше најдобриот играч на натпреварот, а во поразениот состав двоцифрен учинок имаше Немања Недовиќ – 12 поени.
Во дуелот за третото место Шпанија ја победи Австралија со 89:88.