Кавадарци, 26 август 2016 (МИА) - Македонската кошаркарска репрезентација во средата ги заврши подготвителните натпревари, а играчите денеска имаат слободен ден. Селекторот Драган Раца, заедно со градоначалникот на Кавадарци Александар Панов одржаа прес конференција, во пресрет на квалификациите.
-Мене ми е мило што се игра во Кавадарци. Мојот помошник Врбица Стефанов е од овој град. Имаме атмосфера која никој не може да ја сруши. Жално е што јас како селектор ги разигрувам младите играчи. Секој натпревар е различен за секој ривал. Ги завршивме подготовките и изборот за пријателски беше мој. Јас сакав да играме против Црна Гора, БиХ, Словенија (силни репрезентации),... Некогаш подобро е да губиме сега на подготовките, но тоа не е вистинската слика.Задоволен сум од подготовките. До првиот натпревар треба да направиме и некои работи кои треба да се корегираат. Важно беше сите да играат. Со Словенија игравме и со 12 играчи. Вистинската слика ќе ја видите на овие шест натпревари. Цел ни е да одиме на Европско првенство, изјави селекторот Раца.
Македонската кошаркарска репрезентација по подолго време ќе игра надвор од Скопје, а во Кавадарци Македонија настапи пред давесетина години кога беше организатор и на претквалификациски турнир.
-Благодарност до МКФ за можноста Кавадарци да биде домаќин на овие квалификации. Направени се промени во спортската сала. Упатувам покана до сите за првиот натпревар да дојдат во Кавадарци и да ја бодрат Македонија, а со тоа репрезентацијата да го освои и првото место во групата, изјави градоначалникот на Кавадарци Александар Панов.
Македонската репрезентација утре ги продолжува подготовките, а првиот натпревар се игра на 31.август со Луксембург во спортската сала „Јасмин“ во Кавадарци. Другите дуели како домаќини ги играме на 7.септември против Унгарија, а на 14.септември против Велика Британија. Цена на влезница за еден натпревар е 100 денари, а „блок – влезници“ за трите дуели чинат 250 денари.