МЗТ Скопје загуби од Лиеткабелис со минимални (89:90), на премиерниот меч од новото издание на Еврокупот.
На нецели четири секунди пред крајот, по тројката на Синовец македонскиот првак дури и поведе со (89:88), сепак, не го одбрани последниот напад.
Пред се затоа што во тие малку секунди, прво, во обидот да даде тројка, американскиот бек Вилијамс го утна обрачот. А невниманието во одбраната на „сино-белите“ го казни Донатас Таролис.Од „одбојка“ поентираше за победа.
За продолжение на лошата резултатска серија „предизвикана“ со оние четири по ред порази во АБА лигата. Но и најава за подобри денови за тимот од Аеродром, кој и без помошта на еден од најдобрите свои играчи Ѓорѓе Дреновац, покажа дека во овој ростер има и квалитет, но и карактер, но и дека тоа треба да го валоризира за она што и се игра кошарката - победата.
Лиеткабелис - МЗТ Скопје 90:89 (27-22; 23-13, 24-23; 16-31).